Xilase xpacaanda’ | La nostalgia de mi sueño

Xilase xpacaanda'

Dalthon Pineda

Sica redandá dxu’ guidxilayú Guidxiguié’ xtinu
ne ró, ne risaca guirá’ guendanayeche’ ni bisaanane ca binizá laanu.
Zacanga’ bedandá guendaguti xa’na’ guixhe xtilu’ ni cundubi bi nexhelu’ dxiqué
ma’ xhadxi canayubibe lii nga bidxelabe xilase gueela’beeu ndaani’ ladxido’lo’.

Rietenala’dxe’ dxi bicaa xtiipilu’ naa siado’guie’ru’
cayuundaru’ beleguí iqueyoo lidxe’
biupanu ra ñaa ti guete’ dxi’banu’ mani’
chahuidugá nga biu’nu’ lu neza Nisadó’ San Vicente
bindibidxiichinu xha mani’ xa’na’ baca’nda’ bezayaga
ne bide’nu nisa bizé ndaani’ xiga.

Zeda yasaru’ gubidxa xa  iquenu laanu ma cutopanu niza 
ne ma cugu’nu ndaani’ dxumisú nanda xi’que’nu.

Sica biiya’ ti bandá’ xti’ ti mani’ ga’chi’ lade gui’xhi’ lu neza guela
naxiñá rini guié lu.

Gudxe’ lii “Tata” gunabadiidxa’ lii,
Xhi mani’ nga laame pue?
guchibinu lame’, gunda’un  guié nadipa’ Pa ché me xti ladu ya’?

“Pa guchibinu laame’ zaree  guxhooñeme zieme zitu,
Xisi la? Zabiguetame guixhí’, huidxe, guirá si dxi guendanu ra ñaa,
ne zedandá dxi gu’yu laame’ xti  ladu” gu’dxu’ naa.

Yanadxí cayuuna’ huate’ xa ñee ra xpá’lu yooba’ ne yuuba’ro’ ladxiduaya’
Redandá diidxa’ que ique’ “Apa”.
Yanna ru’ ma’ rieene’ xiñee lu xpacaanda’ ruyaa laame que
naandame lii zeeda zame atra
dxiiba’lu’ mani’ zeedu ti guete’.

Ilustración: Manuel Cabrera