Jorge Alberto Cabrera López
Pa ñuú diidxa’ jmá sicarú, nucaania’ laa
guendananá, ne guendanayeche’
dxa’ ndaani’ ladxidua’ huadxí di’
ninni’, ne ñuunda xilase stine’,
runi ca telayú bicuanineu naa
ca son yaa rutiipilu’ dxiqué
ra ma’ biasalu’ cundiibilu’
dxa yunta, gudidineu’ beñe ne niza,
ca dxi guzalu’ bi’nilu’ dxiiña’,
Jñaa biida’ ma’ cayui’ diidxa’, cundiibi xquetalu’
ne cuguu ndaya’ lii
gastiru’ sti diidxa’ ñanda ñuenia’
ca huadxí gurinu xa’na’
ca yaga baca’nda’ bizuhualu’
rua dxa yoo ro’, ra ruyube lii,
ca dxi guendaxcuidi stine’
ninru sti diidxa’, ñanda nuzeetenia’
dxa guendanayeche rusizaani’ guielulu’
ca dxi rindaya’ riganna lii
bixoze goola’, stiidxasinu rini’ni
diidxazá bisiidu naa
diidxazá bixuubalu’ lu nalu’ ne bidxiibalu’ ndaani’ ladxidua’.
Yanadxi rucaa laa,
ne ruzeete lii
neca ma’ qui guinnilu’
neca ma’ ziné diuxi lii
Bixoze’ ziu dxi zadu’yanu
ziu dxi zundanu laa.
[Poema publicado originalmente en la Revista Guidxizá número 12, correspondiente al período Julio-Septiembre de 2008]
